Hiji Catetan

Geus lawas carita urang duaan
Anu munggaran nyicikeun asih kamelang
Teu laas sanajan pada nyorangan
Kedalna lisan satia rek babarengan
Harepan ngayunkeun ka mega malang
Rek mipit bentang laksana nganjang ka bulan
Mekarna kembang endah pangharepan
Ngotret ingetan mukakaeun hiji catetan
Tapi kiwari ngan kuring anu ngageuri
Cuang cieung ngan sorangan
Honcewang hate baluweng
Nu miasih dipeupeurih
Nu mitineung ditinggalkeun
Teu sangka ku jalir jangji
Ku harianeun

Neundeun Harepan

Mun peuting geus jempling
Mikaeling ku hariring
Midangdam nu saurang
Bongan anggang
Harita nyanggupan
Di taun genep puluhan
Ayeuna bet nyalahan
Kajongjonan
Geus ingetan
Kumaha neundeun harepan
Ayeuna geus lekasan
Nu aya ukur catetan
Najan kapegat carita
Manusa ku kawasa
Moal bisa laksana
Anging kersa anjeuna

Tembang Kasmaran

Ligar insani titis kaheman
Putih malati asih sungkeman
Arum kalbu ngawangian sanubari
Angin nebar dalingdingan alam nyaksi pasinina
Lambey kayas meundeut renghap sakedapan
Simpe ngawirahma geter pamirigna
Kantun lagu panutan
Nu mukakeun lawang tineung
Nu ngusik lalakon urang
Kantun imut panutan
Nu ngajak mulang lalakon
Nu ngeundeuk lenyap katresna
Muka lambaran geter kasmaran
Asa duaan tembong deui paguneman
Muka lambaran geter kasmaran
Tineung marengan jeung lelenyapan
Moal hilap kana rupining kaheman
Aya salam aya salam
Salam manis tikatebihan

Bangbara

Katresnan deudeuh nu maneuh
Teu luntur kungsi pasini pajauh
Katresnan deudeuh nu maneuh
Nu waas nyorang papisah papisah
Gumebyar caangna bulan
Kungsi kahalangan mega duh
Asih jatining wanci
Tutulisan nu pinasti
Bangbara leungiteun kembang
Karungkupan dangdaunan
Bangbara duh bangbara
Urang sieun katalimbeng
Bangbara leungit teu pamit
Nu ilang geusan pamuntangan
Nu ngancikan nitis asih
Ditaman langgeng kaheman

Asih Abadi

Sajuringkang lemah putih
Tatapakan meureut getih
Nyadidieu awor asih
Neundeun harepan
Nyengcem angkeuhan
Dina galindengna kawih
Asih tumekaning batin
Nyaah tinandonan nyawa
Demi lautan katut ombakna
Demi daratan katut gunungna
Ditapel wates ngajega
Ngajangan jati waruga

Peuting Nu Urang

Peuting ieu enung peuting nu urang
Sepi jempling taya suara hariring matak hariwang
Alam endah disanding bulan purmana bulan purmana
Simpe jempe matak betah ngumbara dipawenangan dipawenangan
Peuting eta enung kuring kapahung
Sasar lampah henteu puguh nu dijugjud ilang tujuan
Natar ngidul milang imah ngitung lembur nyileuk katukang
Malik ngaler mapay tapak jog anjog ka gedong kosong nu poek mongkleng
Peuting nu urang harita datang
Ukur nembongan reup sakiceup geus euweuh
Peuting nu urang peuting impian
Inditna bareng jeung inditna cahaya

Puspita

Puspita teh kembang
Nu asri dalingding siang
Puspita teh lambang
Nu mangkak ligar dina hate urang
Puspita teh cinta
Nurandakan ku kanyaah
Puspita mustika
Nu medal tina acining kaheman
Waktos ka ambung dina tembang
Wawangina sumerepna lelembutan
Harita aya geter waktos damis kagaris
Siap pameunteu nu kapireung wuwug manis
Dina kembang dilambangkeun cinta urang
Dina lagu dipantengkeun asih urang
Puspita... lagu kalbu
Pujaan satiap waktu keur urang